Аллергология – бұл организмдегі аллергиялық реакциялардың табиғатын зерттейтін, аллергия тудыратын ауруларды алдын алу, диагностикалау және емдеу әдістерін әзірлейтін медицина саласы. Аллергология дерматология, иммунология және пульмонология салаларымен тығыз байланысты.
Аллергия деп ағзаның бұрын әсер еткен заттарға иммундық жүйесінің жоғары сезімталдығы аталады.
Диагностика. Көру мен сұрастырудан басқа аллерголог-дәрігерлер аллергиялық ауруларды диагностикалау үшін алдымен аллергендерді анықтайды, осы мақсатта арнайы сынақтар қолданылады: Ig E антиденелеріне қан анализі және тері сынақтары. Сынақтар екі әдіспен жасалады: шаншумен (прик-тест) немесе тырналумен (скарификациялық тест). Стационарда арандатушы тест тағайындалуы мүмкін (аллергеннің шағын мөлшерін ағзаға енгізіп, реакция бақыланады). Сондай-ақ, элиминациялық тест қолданылады — болжамды аллергенмен байланыс тоқтатылып, науқастың жағдайының қалай өзгергені бақыланады.
Емдеу. Қарсы аллергиялық (антигистаминді) немесе гормоналды препараттар (стероидтар), сыртқа қолданылатын (майлар, кремдер, гельдер) тағайындалады. Алдын алу шаралары қабылданады, ең алдымен — аллергенмен байланысты тоқтату. Қажет болған жағдайда аллергияға қарсы вакцинация жүргізіледі.
Симптомдары. Аллергияның типтік белгілері ұзаққа созылған мұрыннан су ағу, мұрынның бітелуі, дем алу қиындауы, жөтел, түшкіру, терінің қышуы және бөртпелері, терінің қабыршақтануы немесе құрғауы болып табылады. Кейде жүрек айыну, құсу, іш өту (диарея) кездеседі, әлдеқайда жиі көз конъюнктивасының қышуы және қызаруы, қабақтың ісінуі, көзден жас ағу.
Аурулар: аллергиялық ринит, аллергиялық конъюнктивит, есекжем, атопиялық дерматит, бронх демікпесі, Квинке ісінуі, контактты дерматит, поллиноз, анафилактикалық шок. Күнделікті өмірде ауруды белгілейтін ретінде жиі 'аллергия' сөзі қолданылады (өнімдерге, өсімдіктерге, жануарларға, тозаңдарға, дәрі-дәрмектерге т.б.).
